Քաղաքակրթական ներուժը կեցության բարձրագույն արժեք է:

«Baby lab»-ը որոնում է ավելի լավ մանկական թատրոն

07.29.2014

Ռուսաստանում ավարտին են մոտենում «Baby lab» («Մանկական լաբորատորիա») թատրոնի զարգացմանը միտված յուրահատուկ փառատոնի նախապատրաստական աշխատանքները, որի մասնակիցները՝ դրամատուրգներ, կոմպոզիտորներ, ռեժիսորներ, նկարիչներ, խորեոգրաֆներ և դերասաններ են: Այդ մասին «teatral-online.ru»-ի տեղեկատվությունը փոխանցում է «taglur.am»-ը:

Փառատոնի մասնակիցների տրամադրության տակ կլինեն նաև թատերական բեմեր և այլ հարթակներ, որոնց հնարավորություն կտրվի պատվիրել բեմադրություններ և խաղարկել փառատոն-լաբորատորիայում ստեղծված ողջ խաղացանկը:

«Մանկական լաբորատորիա»-ն կանցկացվի մի քանի փուլերով:

Հաղորդագրության մեջ նշվում է, որ օգոստոսի 30-ից սեպտեմբերի 4-ն ընկած ժամանակահատվածում Իտալիայի «La Baracca» թատրոնից կժամանի բեմադրիչ Ռոբերտո Ֆլաբերտին, ով փառատոնի մասնակիցների համար կկազմակերպի բեմադրական և խաղարկային լաբորատորիա: Այդ աշխատանքի արդյունքները պետք է լինեն բեմադրական-ճեպանկարներ, ապագա ներկայացումների փոխադրումներ:

Իսկ հոկտեմբերի վերջին կայանալիք «Մեծ դասամիջոց» փառատոնի շրջանակներում կկազմակերպվի հատուկ ծրագիր (ներկայացումներ և վարպետաց դասեր) մանկական թատրոնի վերաբերյալ:

2015 թ.-ի մարտին համառուսաստանյան «Ոսկե դիմակ» փառատոնի ժամանակ կանցկացվի այս նախագծի շրջանակներում իրականացված ներկայացումների ցուցադրությունը:

«Մանկական լաբորատորիա»-ն նախատեսում է նաև աշխատանքներ ամենափոքրիկ հանդիսատեսների համար նախատեսված թատրոնի ոլորտի եվրոպական առաջատար վարպետների հետ, բեմադրական թիմերի ձևավորում և ներկայացումների մշտական վարձույթի կազմակերպում՝ գործընկերների հարթակներին:
    Դիտվել է 1058 անգամ