Քաղաքակրթական ներուժը կեցության բարձրագույն արժեք է:

Մայրաքաղաքային թատրոնի նոր խաղաշրջանն, ըստ էության, բացվել է գավառում

09.09.2014

2014-2015թթ.-երի թատերաշրջանը Մոսկվայի Վախթանգովի անվան պետական ակադեմիական թատրոնն սկսել է շատ ավելի շուտ, քան դա կիրականացվի ըստ պաշտոնական օրացույցի՝ սեպտեմբերի 10-ին: Այդ մասին հաղորդում է ,,taglur.am,,-ը՝ հղում անելով ,,ԻՏԱՐ-ՏԱՍՍ,,-ին:

Բանն այն է, որ օգոստոսի վերջերին, իր պատմության մեջ առաջին անգամ, այս թատրոնը մեկնեց ռուսական գավառներից՝ Բուրիաթիայի հանրապետություն, և հանդես եկավ տեղի՝ Ուլան-Ուդեի թատերասերների առջև: Սեպտեմբերի 1-7-ին, մեկշաբաթյա ժամկետում, վախթանգովցիները ցուցադրեցին իրենց լավագույն 8 ներկայացումները, որոնցում, ընդհանուր առմամբ, ընդգրկած են թատերախմբի գրեթե ողջ անդամները: Գլխավոր դերերում հանդես են եկել Վասիլի Լանավոյը, Լյուդմիլա Մաքսակովան, Իրինա Կուպչենկոն, Սերգեյ Մակավեցկին և մյուս հանրաճանաչ և վաստակաշատ արտիստները:

Վախթանգովցիները իրենց ներկայացումները խաղացել են Խոցա Նամսարաևայի անվան դրամայի ակադեմիական և Բեստուժևի անվան ռուսական դրամատիկական թատրոնների բեմահարթակներում: Ընդհանուր առմամբ ցուցադրվել է 13 ներկայացում, որոնց թվում ,,Աննա Կարենինա,,-ն, ,,Քեռի Վանյա,,-ն, ,,Մեդեա,,-ն, ,,Իմ լռին հայրենիք,,- համերգ-ներկայացումը և այլն:

,,Նոր թատերաշրջանի առաջին ներկայացումները տնից դուրս, դա լրացուցիչ լարվածություն է, ինքնամոռացում: Շատ լավ սկիզբ է,, ,-ասել է թատրոնի գեղարվեստական ղեկավար Ռիմաս Տումինասը:

Վախթանգովյան թատրոնի նոր թատերաշրջանի նորություններից մեկն էլ այն է, որ 2015թ.-ի մարտին շարք կմտնի Փոքր դահլիճը:

Վերջում ավելացնենք, որ թատրոնը վաղը՝ սեպտեմբերի 10-ին տեղի ունենալիք իր նոր՝ 94-րդ թատերաշրջանի պաշտոնական բացումը կսկսի պրեմիերայով: Կներկայացվի Բոմարշեի հանրահայտ ,,Խելակորույս օր, կամ Ֆիգարոյի ամուսնությունը,, կատակերգությունը՝ Վլադիմիր Միրզոևի բեմադրությամբ:
    Դիտվել է 1017 անգամ