Քաղաքակրթական ներուժը կեցության բարձրագույն արժեք է:

Նոր եվրոպական թատրոնի գերմանական այցեքարտերը

11.27.2014


Գերմանական հայտնի «Շաբյունե» թատրոնը Մոսկվայում ընթացող Նոր եվրոպական թատրոն (NET) փառատոնի շրջանակներում կներկայացնի երկու բեմադրություն: Դա ռեժիսոր Քեթի Միթչելի «Շնչառություն» և Միխայել Թալհայմերի մոլերյան «Տարտյուֆի» բեմական ընթերցումներն են: Այդ մասին «РИА Новости»-ի տեղեկատվությունը փոխանցում է «taglur.am»-ը:

Այդ ներկայացումները կցուցադրվեն նոյեմբերի 29-ին և 30-ին, որոնցից առաջինը կկայանա «Ստանիսլավսկի» էլեկտրաթատրոնի բեմում, իսկ երկրորդը՝ Ազգությունների թատրոնում:

Քեթի Միթչելը առաջին անգամ չի մասնակցում NET փառատոնին: Նրա բեմադրած «Քրիստինա» ներկայացումը 2012թ.-ին կայացած այս նույն թատերական ֆորումի շրջանակներում դարձել էր ամենագլխավոր հիթը: Իսկ այս տարի Մոսկվա բերած «Շնչառություն» վերնագրով նոր ներկայացումը նախորդ աշխատանքներից նախ և առաջ տարբերվում է ռեժիսորի ձեռագրի նոր գեղագիտությամբ, որտեղ նա հրաժարվել է մինչ այս իրեն բնորոշ կինոյի և թատրոնի սերտ միահյուսումից:

Ներկայացման հերոսները մեծ քաղաքում ապրող 30-ամյա տղամարդ ն ու կինն են, որոնք ստացել են լավ կրթություն և ունեն դրան համապատասխան աշխատանք: Սուրճը նրանք գնում են այն խանութներից, որոնցում պահպանում են արդար առևտրի պայմանավորվածությունները, դիտում են «արթ-հաուսային (ժամանակակից արվեստի ոճավորմամբ ձևավորված բնակարանային) կինոնկարներ՝ բնօրինակ լեզվով, բայց սուբտիտրային թարգմանությամբ և կարդում են հրատապ թեմաներով գրքեր: Նրանք իրենց համարում են օրինապահ մարդ և երկուսն էլ ցանկանում են երեխա ունենալ:

Այդ ժամանակ Երկիր մոլորակի բնակչության թիվն սկսում է գերազանցել 7 միլիարդը, և յուրաքանչյուր վայրկյանը մեկ ծնվում է ավելի քան 2 մարդ: Ջրի և ուտելիքի պահանջարկը ավելանում է էլեկտրական էներգիայի և այլ ռեսուրսներիսպառման ծավալների աճի հետ միասին: Մոլորակին սպառնում է մարդկանցով գերծանրաբեռնվածությունը և օդի ջերմաստիճանի գլոբալ բարձրացումը:

«Գլխավոր հարցը, որ մենք տալիս ենք ներկայացման մեջ, դա երեխա ծննդաբերելու իրավունքն է՝ բնապահպանական վատ պայմանների առաջացման իրավիճակում: Ամբողջ գործողության ընթացքում դերասանները պտտում են մարզահեծանիվի ոտնակները բեմի լուսավորության համար արտադրելով էլեկտրաէներգիա: Դրանով ես ցանկացել եմ ավելի շոշափելի դարձնել ռեսուրսների պահանջարկի նկատմամբ ունեցած մեր հիմնախնդիրը: Իմ աշխատանքներում ձևը և բովանդակությունը գոյություն չունեն մեկը մյուսից առանձին»,- ասել է Միթչելը:

Միխայել Թալհայմերի մոլերյան «Տարտյուֆ» ներկայացումը իրադարձության է վերածվել նույնիսկ այնպիսի մի թատերական քաղաքի համար, ինչպիսին Բեռլինն է: Բոլորին հայտնի պիեսի պատմությունը այստեղ շրջվել է գլխիվայր՝ թե ուղղակի և թե անուղղակի իմաստով:

«Ռեժիսորը ամբողջ գործողությունը տեղավորում է պատի վրա, կարծես դրանով ցանկանալով ասել, որ «աշխարհը փշաքաղվել է», որ ամեն ինչ տեղից ընկել է: Թալհայմերի համար շատ կարևոր է տարածությունը, որը շատ բանով կանխագծում է նրա բեմադրությունը: «Տարտյուֆում» բեմական տարածությունը ստեղծում է ռեժիսորի մշտական համահեղինակ նկարիչ Օլաֆ Ալթմանը: Իսկ Տարտյուֆը, հայտնի ստախոսը և երեսպաշտը, ով սննկացնում է օրինապաշտ ընտանիքը, ի հայտ է գալիս գրեթե Քրիստոսի կերպարով»,- նշել է փառատոնի արթ-տնօրեն Ռոման Դոլժանսկին:

Տարտյուֆի դերակատար Լարս Այդինգերի աշխատանքը բարձր գնահատականի է արժանացել գերմանացի քննադատների մոտ: Նրանք նշում են, որ այս դերը հայտնի դերասանի հաջողված դերակատարումներից մեկն է: Նշենք, որ նա շուտով հանդես է գալու Ալեքսեյ Ուչիտելի դեռ նախապատրաստության փուլում գտնվող ֆիլմում՝ Նիկոլայ 2-րդ ցարի դերակատարմամբ:

Քեթի Միթչել
Ավարտել է Օքսֆորդի համալսարանի քոլեջը: Աշխատանքային գործունեությունը սկսել է Լոնդոնի թատրոններում: 1994 թ.-ից սկսել է աշխատել Բրիտանիայի թագավորական ազգային թատրոնում, իսկ 2003 թ.-ից դարձել է այդ թատրոնի գեղարվեստական ղեկավարը: Նա բեմադրում է նաև օպերաներ և իր գործերը ներկայացրել է աշխարհի ամենատարբեր առաջատար բեմահարթակներում:

Միխայել Թալհայմեր
Իր կարիերան սկսել է որպես դերասան: Ռեժիսորական առաջին աշխատանքը իրականացրել է 1997 թ.-ին: Բեմադրում է դրամտաիկական և օպերային ներկայացումներ: Սերտ համագործակցում է «Դոյչե» թատրոնի հետ: Նրա բեմադրած ներկայացումները ցուցադրվում են շատ երկրների առաջատար թատրոններում:




    Դիտվել է 902 անգամ