Քաղաքակրթական ներուժը կեցության բարձրագույն արժեք է:

Բոլոր դերասանները բեմում լրիվ մերկանում են

02.17.2015

Մոսկվայի Կիրիլ Գանինի ղեկավարությամբ գործող կոնցեպտուալ թատրոնը փետրվարի 18-ին կներկայացնի Ռուսաստանի ռազմարդյունաբերական համալիրի կազմում գտնվող «Օբորոնսերվիզ» միավորման աղմկահարույց քրեական գործում գլխավոր գործող անձ հանդիսացող Եվգենիա Վասիլևայի մասին ներկայացում՝ «Պաշտպանության նախարարի հողաթափերը» վերնագրով: Այդ մասին թատրոնի պաշտոնական կայքի տեղեկատվությունը փոխանցում է «taglur.am»-ը:

Իսկ «lenta.ru»-ն հաղորդում է, որ բեմադրությունը կառուցված է Վասիլևայի սիրային լիրիկայի և նրա կյանքի պատմության շուրջ: Բացի այդ, հանդիսատեսներն առաջին անգամ կտեսնեն մի գրաֆիկական աշխատանք, որտեղ նա սև ֆլոմաստերով հիշողությամբ պատկերել է ՌԴ նախկին պաշտպանության նախարարի սեռական օրգանը:

Եվգենիա Վասիլևան Ռուսաստանի Պաշտպանության նախարարության ապրանքային հարաբերությունների դեպարտամենտի նախկին ղեկավարն է: Նա հայտնի է նաև իր ստեղծագործական աշխատանքներով: 2014 թ.-ին լույս տեսավ նրա բանաստեղծությունների ժողովածուն՝ «Ժենյա Վասիլևայի տերեփուկային երգերը» վերնագրով, ապա բացեց իր նկարչական աշխատանքների ցուցահանդեսը և նույնիսկ հայտնի մոդելագործ Սերգեյ Զվերևի հետ հասցրեց աշխատել իր հեղինակած մի երգի վրա:

Այժմ Վասիլևան տնային կալանքի տակ է, որի ժամկետը լրանում է մարտի 23-ին:

2014 թ.-ի հուլիսի 1-ին Մոսկվայի Պրեսնյայի շրջանի դատարանը սկսել է «Օբորոնսերվիզ» միավորմանը պատկանող անշարժ գույքի, հողի և արժեթղթերի հետ կապված Վասիլևայի խարդախությունների վերաբերյալ դատական վարույթը: Ըստ առաջադրված մեղադրանքի նա պետությանը հասցրել է ավելի քան 3 մլրդ ռուբլու վնաս:

Իր մեղքը Վասիլևան չի ընդունում:

Ավելացնենք, որ թատրոնի ազդագիրը հայտարարում է, որ բոլոր դերասանները բեմում լրիվ մերկանում են, որ լուսանկարելը կամ տեսագրելը արգելվում է: Արգելվում է նաև մինչև 18 տարեկան երեխաների մուտքը ներկայացման դահլիճ:
    Դիտվել է 930 անգամ