Քաղաքակրթական ներուժը կեցության բարձրագույն արժեք է:

Հայրենական բեմադրությունը մերժվեց, բայց կներկայացվի դրա ամերիկյան տարբերակը

10.27.2015


Հոկտեմբերի 31-ին Ռիխարդ Վագների «Թանհեյզեր» օպերան Նյու-Յորքից ուղիղ հեռահաղորդմամբ կցուցադրվի Ռուսաստանի 6 քաղաքներում, այդ թվում նաև Մոսկվայում և Պետերբուրգում, իսկ դրանից հետո այդ երկրի ևս 30 քաղաքների կինոթատրոններում հանդիսկանները կարող են դիտել օպերայի տեսագրված տարբերակը: Այդ մասին տեղեկացնում է «taglur.am»-ը՝ հղում անելով «РИА новости»-ին:

Ցուցադրությունն իրականացնող «CoolConnections» արթ-միավորումը տեղեկացնում է, որ Օտտո Շենկի դասական բեմադրությունը հայտնի «Մետրոպոլիտեն օպերայի» բեմ է վերադրձվել ավելի քան 10-ամյա բացակայությունից հետո: Գլխավոր դերում իր դեբյուտը կնշի Յոհան Բոթան:

Հիշեցնենք, որ Ռուսաստանի Նովոսիբիրսկ քաղաքի թատրոնում վագներյան այս օպերայի բեմականացումը առաջացրեց մեծ աղմուկ, որի զարգացումները հասան մինչև դատարան: Քրեական գործեր հարուցվեցին «Թանհայզեր»-ը բեմականացրած Տիմոֆեյ Կուլյաբինի և հաստատության տնօրեն Բորիս Մեզդրիչի նկատմամբ: Նրանք մեղադրվում էին ներկայացման մեջ «կրոնական առարկաները սրբապղծելու» համար: Թեև հանցակազմի բացակայության պատճառով քրեական գործը կարճվեց, սակայն թատրոնի տնօրենը ազատվեց աշխատանքից, իսկ նրան փոխարինած Վլադիմիր Կոխմանը ներկայացումը հանեց խաղացանկից:
    Դիտվել է 975 անգամ