Քաղաքակրթական ներուժը կեցության բարձրագույն արժեք է:

Անաստասիան կերգի և կպարի Բրոդվեյում

03.04.2016


Ռուսաստանցի պրոդյուսեր Դմիտրի Բոգաչյովը հորդորել է ամերիկացի կոմպոզիտոր Սթիվեն Ֆլարետիին ստեղծել ևս 16 երաժշտական համարներ՝ ի հավելումն այն 6 ստեղծագործությունների, որոնք նա հեղինակել է «Անաստասիա» անիմացիոն ֆիլմի համար: Այդ մասին տեղեկացնում է «taglur.am»-ը՝ հղում անելով «teatral-online.ru»-ին:

Բոգաչյովը իր նոր նախագիծն սկսել է Մոսկվայում իրադարձային համարվող «Կատուներ», «Օպերայի ուրվականը» և մի շարք այլ հայտնի մյուզիքլների բեմականացումներն իրականացնելուց հետո: Նրա նոր նախագիծը վերաբերում է 1917 թ.-ին բոլշևիկյան պատժիչ մեքենայի զոհը դարձած ռուսական Նիկոլայ 2-րդ կայսեր ընտանիքի իբր կենդանի մնացած միակ անդամի՝ արքայադուստր Անաստասիայի կյանքի ոդիսականին և կբեմադրվի սկզբում Քնեքթիքութ քաղաքի «Հարթֆորդ սթեյջ» թատրոնում, ապա մեկ ամիս հետո կտեղափոխվի Նյու-Յորք և կշարունակի ցուցադրվել Բրոդվեյում:

Նոր մյուզիքլի բեմադրող ռեժիսորն է «Թոնի» մրցանակի դափնեկիր Դարկո Թրեսնյակը: Այն կիրականացվի ըստ այն անիմացիոն հայտնի ֆիլմի, որը նկարահանվել է «ХХ Century Fox» ընկերությունում: Պրեմիերան նախատեսված է մայիսի 12-ին:

Հիշեցնենք, ըստ լեգենդի, իրեն ռուսաստանի վերջին կայսրի դուստր հռչակած Աննա Անդերսոնը ներկայացնում է որ ինքն իրականում Ռոմանովների դինաստիայի ժառանգն է և փրկվել է Իպատևի տանը թաքնվելով: Նրա այս պատմության արձագանքները վերածվեցին մի քանի գրքերի, իսկ 1956 թ.-ին, նույնիսկ, նկարահանվեց ֆիլմ Ինգրիդ Բերգմանի գլխավոր դերակատարմամբ: Հիշեցնենք, որ այդ դերակատարման համար նշանավոր արտիստուհին արժանացավ Ամերիկյան կինոակադեմիայի բարձրագույն պարգևին՝ «Օսկար» մցանակի:

Տեսանյութեր

Դիտվել է 976 անգամ