Քաղաքակրթական ներուժը կեցության բարձրագույն արժեք է:

Ինչ է իրենից ներկայացնում տիեզերքում ֆիզիկական միավոր լինելը

11.12.2017

Մոսկվայում ընթացող ժամանակակից պարի «DanceInversion» փառատոնում նախորդ երկու օրերին՝ նոյեմբերի 10-ին և 11-ին իր նոր՝ «Անհանգիստ հոգու արձագանքը/Հավերժական շարժիչ» բեմադրությամբ Ստանիսլավսկու և Նեմիրովիչ-Դանչենկոյի անվան երաժշտական թատրոնում հանդես եկավ Գերմանիայի Դրեզդեն և Ֆրանկֆուրտ քաղաքներում ստեղծագորող, «Dresden Frankfurt Dance Company»-ի ղեկավար, ծագումով իտալացի խորեոգրաֆ և բեմադրիչ Ջակոպո Գոդանին: Դասական և ժամանակակից պարերի համակեցության, տիեզերքում մարդու տեղի ու նշանակության և այդ համակարգում նրա ֆիզիկական ներկայությունը առավել բովանդակալից, օգտակար և իմաստավորված դարձնելու մասին իր մտքերը նա համառոտ բարձրաձայնել է ռուսական հեռուստատեսության «Կուլտուրա» ալիքին տված հարցազրույցում, որը առավել հետաքրքրական հատվածները թարգմանաբար իր ընթերցողներին է ներկայացնում «ԹԱԳԼՈՒՐ»-ը:

- Իմ ընկերության համար բալետը մի գործիք է, որի օգնությամբ ուսումնասիրում ենք այս աշխարհում սեփական մարմնի զգացողությունները: Մենք դիտարկում ենք թե ինչ է իրենից ներկայացնում տիեզերքում ֆիզիկական միավոր լինելը և ինչպես անել, որ այդ միավորը դառնա կատարյալ: Ես փորձում եմ հասկանալ ինչպես անել, որ իմ մարմինը դարձնեմ տիեզերք թռչող ռուսական հրթիռ այն հեծանիվի փոխարեն, որը ընթանում է Կալդովինի փողոցով: Այդ մասին են երեք փուլերի կազմված իմ բալետները, որոնք ինքներս մեզ ուսումնասիրելու մասին են:

Ինձ համար, ամբողջ աշխարհում, ամենից հետաքրքիր և կլանող բաներից մեկը գիտությունն է: Չկա առավել ցնցող բան, քան այն, որ ընկերությունում մենք նայում ենք մեզ հայելու մեջ և մտածում մարմնի մասին. ինչու այս մասը այսպես չի աշխատում, ինչպես կարող եմ դառնալ ավելի նուրբ, իմ շարժումների համադրությունների մեջ առավել չշգրիտ, ինչպես հակադրեմ գլուխս՝ ձեռքերիս և, միաժամանակ, դա համատեղեմ ինչ-որ դասական ճկման հետ: Անհրաժեշտ է ամեն օր դիտարկել ինքդ քեզ և լինել ինքդ քեզ համար ամենից լավը և ամենից խիստ քննադատը և ուսուցիչը:

Ես Ռուսաստանում ցույց կտամ նաև բեմադրություններ, որոնք ոչ մի ընդհանրություններ չունեն դասական պարի հետ:
Վերջին 20 տարիներին պարերն ուսումնասիրող որոշ մասնագետներ անհրաժեշտից ավելի էին ճկել փայտիկը և շրջվել դեպի ժեստերը, դիմախաղը, վարքաբանությունը: Ձևավորվել էր ինչ-որ մի հակապար և մարդիկ թատրոններ այլևս չէին հաճախում:

Մարդիկ ասում էին.«Բայց նրանք չեն պարում«: Իսկ նրանց պատասխանել էին.«Դուք չեք հասկանում, սա կոնտեմպ է, ավանգարդ: Իսկ մարդիկ ասել էին.«Մենք հասկանում ենք բայց նրանք չեն պարում»; Ահա թե ինչու մեր ընկերությունը գալիս է դասականից և ես զգույշ ներդնում եմ ժամանակակցի տարրեր՝ ձգտելով չսպանել պարը:

Ես կարծում եմ, որ դա հին հայացք է, երբ կարծում են, թե մեկ մարդը պետք է զբաղվի միայն ինչ-որ մեկ գործով: Խորեոգրաֆների մեջ կան մարդիկ, որոնք չեն կարողանում նկարել հագուստի էսքիզ: (Ինքը՝ Գոդանին իր բեմադրությունների և լուսավորողն է, նկարիչը, և սցենոգրաֆը, և խորեոգրաֆը, և ռեժիսորը)

Ես փորձում եմ ասել մարդկանց.«Դուք գաղափար անգամ չունեք, թե ինչպես եք շարժվում այս աշխարհում: Դուք ձեր ներուժի միայն 10-րդ մասն եք: Եթե չուսումնասիրեք, թե ինչպես ձեզ զարգացնեք սեփական կյանքի ամեն օրվա մեջ, երբեք չեք իմանա, թե ով եք դուք:

Վերջում ավելացնենք, որ ժամանակակից պարի «DanceInversion» փառատոն կեզրափակվի դեկտեմբերի 3-ին ամերիկյան «Ջեյսիկա Լանգ դանս» ամերիկյան պարային թատերախմբի ելույթով:

Տեսանյութեր

Դիտվել է 929 անգամ