Քաղաքակրթական ներուժը կեցության բարձրագույն արժեք է:

Արթ-սրճարանի հարթակից` հռչակավոր թատրոնի բեմ՝ մեկ գիշերում

12.21.2017

Օրերս, Մոսկվայում, Վախթանգովի անվան թատրոնում «Եվայի ձեռնադրությունը» բեմադրության մեջ գլխավոր դերակատարներից մեկի՝ Վասիլի Լանավոյի հիվանդության պատճառով ներկայացումն ստիպված են եղել չեղյալ հայտարարել և հանդիսատեսներին առաջարկել տոմսերը ետ վերադարձնել կամ դիտել դերասան Եվգենի Կնյազևի կատարմամբ «Պիկովոյա դամա» մոնոներկայացումը: Այդ մասին տեղեկացնում է «taglur.am»-ը՝ հղում անելով «teatral-online.ru»-ին:

Թատրոնի տնօրինությունն այդպիսի ստիպողական լուծման էր հանգել այն պատճառով, որ խիստ անհանգստացած էր չեղյալ հայտարարված ներկայացման փոխարեն հանդիսատեսին փակ դռներով դիմավորելու հեռանկարից:

Հրատապ կարգավորում պահանջող հարցի այսպիսի լուծումը ռիսկային էր այնքանով, որ «Պիկովոյա դամա» մոնոներկայացումը բեմադրվել է անհամեմատ փոքր միջավայրում և հարթակում՝ թատրոնի արթ-սրճարանում ցուցադրելու համար: Այն ձևաչափով չէր համապատասխանում մեծ բեմում, հսկայական հանդիսասրահի առջև ներկայացնելու պահանջներին: Ինչպես նշում է Կնյազևը, նման իրավիճակը «Պահանջում է այլ գործիքակազմ, բեմական գործողության զգալի վերակառուցում, քանի որ հիմնական բեմում գործում են բոլորովին այլ խաղի կանոններ»:

Սակայն իրավիճակից պատվով դուրս գալու, երկարամյա գործընկերոջ ակամա «թերացումը» հարթելու և թատրոնի վարկը պահպանելու ձգտումն ի վերջո հաղթել է և Եվգենի Կնյազևը կատարել է իր համար ռիսկային որոշում: Ընդհամենը մեկ գիշերվա մեջ նա ոչ միայն տրամադրվել է վախտանգովյան թատրոնի հիմնական բեմ դուրս գալու հոգեվիճակին, այլև հասցրել է նվագախմբի հետ կատարել անհրաժեշտ նախապատրաստական աշխատանք...

Եվ միայն երեկոյան,ներկայացումից հետո, հանդիսատեսի առաջ խոնարhումների ժամանակ, նա հասկացել է, որ ամեն ինչ անցել է գերազանց...
    Դիտվել է 884 անգամ