Քաղաքակրթական ներուժը կեցության բարձրագույն արժեք է:

Իսկ որտե՞ղ մնացին Օրփեոսը և դժոխքը

09.21.2018

Այսօր՝ սեպտեմբերի 21-ին, Մոսկվայի «Դրամատիկական արվեստի դպրոց» թատրոնում ռեժիսոր Իգոր Յացկոն կներկայացնի ամերիկացի դրամատուրգ Թեննեսի Ուիլյամսի »Օրփեոսը իջնում է դժոխք» պիեսի իր մեկնաբանությունը: Այդ մասին տեղեկացնում է «taglur.am»-ը՝ հղում անելով «teatral-online.ru»-ին:

Գործողությունները ծավալվում են 1930-ականների Ամերիկայի մի գավառային քաղաքի ոչ մեծ հանրախանութում:

Լեյդի Թորենսը, որը տեսել է անհայրության դաժան զրկանքները և ամուսնու դավաճանությունը, հայտնվում է սոցիալական կյանքի ստորին աստիճանում: Վերջնական կործանումից փրկվելու համար նա վաճառվում է Ջեյբ Թորենսին, որը դաժան և կոպիտ մարդ է: Լեյդին նրա հետ ապրում է երկար տարիներ, թեև այդ մարդուն ատում է ամբողջ էությամբ:

Ջեյբը, որը կնոջից տարիքով մեծ է, հիվանդանում է՝ վերածվելով անկողնային հիվանդի: Նրա փոխարեն ընտանեկան բիզնեսը շարունակում է Լեյդին: Նա իր մոտ աշխատանքի է ընդունում այս քաղաքում հայտնված երիտասարդ և հմայիչ թափառաշրջիկ Վելին և քիչ անց սիրահարվում նրան: Կինը հղիանում է նրանից և իր կարծիքով կրկին սկսում է ապրել: Սակայն նրա կատաղած ամուսինը փոխհրաձգության մեջ է մտնում, որի հետևանքով այս գործողության բոլոր գլխավոր անձինք զոհվում են:

Իսկ որտե՞ղ մնացին այսքանից հետո Օրփեոսը և դժոխքը:

Հին հունական առասպելի հետ զուգահեռները այս պիեսում ծածկագրված են հերոսների կերպարներում: Մահացու հիվանդ Ջեյբ Թորենսը հենց Հադեսի (դժոխքի) մարմնացումն է: Նրան խնամող կինը մահվան մարմնացումը: Լեյդի Թորենսը նույնականում է Էվրիդիկայի հետ: Թափառաշրջիկ Վելը՝ Օրփեոսն է, որը հայտնվում է «դժոխքի թագավորությունում», որպեսզի փրկի իր Էվրիդիկային:

Ասենք, որ ներկայացման ընթացքում էկրանին ցուցադրվում են 30-ական թվականների Ամերիկյան կյանքին բնորոշ վավերագրական կադրեր (ներգաղթյալներ, չոր օրենքը գործողության մեջ, Քու-Քուքս-Քլանի չարագործություններ և այլն), որոնք կարծես նյութականացնում են հանդիսատեսի աչքերում այն ամենը, ինչի մասին խոսում են հերոսները:
    Դիտվել է 862 անգամ