Քաղաքակրթական ներուժը կեցության բարձրագույն արժեք է:

Այսօր Պետրոս Ադամյանի ծննդյան օրն է՝ 164-րդ տարելիցը

12.21.2013

Ռուսական մամուլում նրա մասին այսպես են գրել «Իր տաղանդի չափով, Ադամյանն այն արտիստներից է, որոնց նմանները նույնիսկ Եվրոպայում են քիչ»:

Հայ մեծ դերասանը ծնվել է 1849 թ. այս օրը, Կոստանդնուպոլիսում: Նա ոչ պակաս հաջողությամբ իր խոսքն է ասել նաև որպես բանաստեղծ, գրող, նկարիչ և հասարակական գործիչ: Բայց, անշուշտ, Պետրոս Ադամյանը հայ մշակույթի պատմության մեջ իր առանձնահատուկ տեղն ունի որպես բեմական արվեստի խոշորագույն ներկայացուցիչ:

Բազմադարյա հայ թատրոնի պատմության մեջ Ադամյանն առաջինը կերպավորեց շեքսպիրյան Համլետին: Դա 1880 թ.-ին էր:

Իսկ նրա առաջին բեմելը տեղի է ունեցել, երբ 17 տարեկան էր: Այդ ժամանակ նա շատ փոքրիկ դերով հանդես եկավ Արևելյան թատրոնում բեմադրված «Գուլիելմոս աշխարհակալ» ներկայացման մեջ: Առաջին մեծ դերն Ադամյանը մարմնավորել է 1867 թ.-ին, Միքայել Նալբանդյանի մահվան առաջին տարեդարձին նվիրված երեկոյին՝ «Վարդան Մամիկոնեան. փրկիչ հայրենյաց» պիեսի բեմադրության մեջ: Դրան արդեն հաջորդեցին նրա մարմնավորած շուրջ 300 դերակատարումները, որոնք ներկայացրել է ռուսական կայսրության տարածքում գտնվող ամենատարբեր քաղաքներում՝ սկսած Պետերբուրգից, հայաբնակ Նոր Նախիջևանից ու Աստրախանից, վերջացրած հայկական Շուշի քաղաքով: Օդեսայում մեծ դերասանը ընտրվել է Օդեսայի գիտնականների ու գրողների և Գեղավեստից ակադեմիայի պատվավոր անդամ։

Վերջին անգամ բեմ է բարձրացել 1889թ. դեկտեմբերի 10-ին:

Մահկանացուն կնքել է 1891թ.-ի ապրիլի 6-ին, երբ նա 41 տարեկան էր:

Պետրոս Ադամյանի մարմնավորած դերերից են՝

- Համլետ՝ Վ.Շեքսպիրի «Համլետ»-ում
- Օթելլո՝ Վ.Շեքսպիրի «Օթելլո»-ում
- Ֆրանց Մոոր՝ Ֆ.Շիլլերի «Ավազակներ»-ում
- Ժադով՝ Ա.Օստրովսկիու «Եկամտաբեր պաշտոն»-ում
- Չացկի՝ Ա.Գրիբոյեդովի «Խելքից պատուհաս»
- Կրեչինսկի՝ Ա.Սուխովո-Կոբիլինի «Կրեչինսկու հարսանիքը»-ում
- Արբենին՝ Մ.Լերմոնտովի «Դիմակահանդես»-ում
- Խլեստյակով՝ Ն.Գոգոլի «Ռևիզոր»-ում
- Արման՝ Ա.Դյումաի (որդու) «Քամելիազարդ տիկինը»-ում
- Քին՝ Ա.Դյումաի (որդու) «Քին»-ում
- Ջանումյան՝ Ա.Քիշմիշյանի «Օրիորդ Բերոյանց»-ում
- Կորրադո՝ Պ.Ջակոմետտիի «Ոճրագործի ընտանիքը»-ում
- Ուրիել Ակոստա՝ Կ.Գուցկովի «Ուրիել Ակոստա»-ում
- Ատրներսեհ՝ Մուրացանի «Ռուզան»-ում
- Մասիսյանց՝ Գ.Սունդուկյանի «Խաթաբալա»-ում
- Միքայել՝ Գ.Սունդուկյանի «Էլի մեկ զոհ»-ում և այլն:
    Դիտվել է 1168 անգամ