Քաղաքակրթական ներուժը կեցության բարձրագույն արժեք է:

«Հայֆեստը» շարունակում է պահպանել կատարողական արվեստի գաղափարը

10.01.2014

Այսօր, հոկտեմբերի 1-ի երեկոյան Երևանում կմեկնարկի 12-րդ «Հայֆեստ» միջազգային փառատոնը, որը կրում է «Փառատոնային իրարանցում» խորագիրը:

Այս տարի երևանյան յուրահատուկ ստուգատեսում իրենց նոր ստեղծագործական ձեռքբերումները կներկայացնեն 18 երկրներից ժամանած 200 մասնակիցներ, այդ թվում ոլորտում հեղինակություն վայելող արվեստագետներ, արթմենեջերներ, միջազգային փառատոների նախագահներ, թատերագետներ:

Երևանի 10 բեմահարթակներում կցուցադրվի 50 ներկայացում:

Փառատոնի հանդիսավոր բացումը տեղի կունենա Ստանիսլավսկու անվան պետական ռուսական դրամատիկական թատրոնում, որին կհետևի «Լիվինգ փիքչրս» թատրոնի (Մեծ Բրիտանիա) «Կենդանի մակերես» մուլտիմեդիա ներկայացումը::

«Փառատոնն իր բնույթով և բովանդակությամբ համընկնում է Հայաստանի կառավարության մշակութային քաղաքականության կանոներին և սկզբունքներին: Այն ապահովում է մեր հանրապետության մշակութային բազմազանությունը» ,- միջոցառման մեկնարկից մի քանի ժամ առաջ կայացած մամլո ասուլիսում ասաց ՀՀ մշակույթի նախարարության ներկայացուցիչ Արամ Գյուրջյանը: Նա հատկապես կարևորեց «Հայֆեստի» կրթական բաղադրիչի կարևորությունը, քանի որ հանդիսատեսը ոչ միայն կհաղորդակցվի ժամանակակից հետաքրքիր թատերական մտահղացումների հետ, այլև կմասնակցի միջոցառման շրջանակներում կազմակերպվող բովանդակալից և ուսանելի վարպետության դասընթացների, ինչն, անշուշտ, նպաստում է մասնագիտական հարթության մեջ համապատասխան ստեղծագործական մթնոլորտի ձևավորմանը;

«Մենք փառատոնում շարունակում ենք պահպանել կատարողական արվեստների գաղափարը: Այսինքն մենք ոչ միայն թատրոն ենք ներկայացնում, այլ նաև կատարողական արվեստի տարբեր ճյուղեր՝ պար, երաժշտություն և այլն: Այս ամենը նպաստում է, որ հայկական թատրոններում փոփոխություններ լինեն»,- ասաց փառատոնի նախագահ Արթուր Ղուկասյանը: Նա ընդգծեց, որ փառատոնում ցուցադրվում են բեմարվեստի այնպիսի նմուշներ, որոնք կայանում են տարավա ընթացքում, իսկ մասնագետները և հանդիսատեսները ինչ-ինչ պատճառներով չեն կարող տեսնել: Ըստ «Հայֆեստի» նախագահի հայկական ժամանակակից թատրոնը իր որակներով միանշանակ հարթության մեջ չի հարաբերվում «եվրոպական թատրոն» հասկացության հետ: Եվրոպայում կան երկրներ, որոնք ավանդաբար առաջատար են թատերական մշակույթի ասպարեզում (Անգլիա, Գերմանիա, Լեհաստան և այլն), և կան այնպիսիները, որոնց համեմատությամբ Հայաստանն է գտնվում նախապատվելի մակարդակի վրա (Ալբանիա, Սլովակիա): Այս երևույթը Ղուկասյանը համարում է օրինաչափ, քանի որ երկիրը դեռևս չունի համապատասխան ռեսուրսներ: Սակայն Փառատոնը այդ հանգամանքը փորձում է հարթել տարվա ընթացքում արտասահմանում աչքի ընկած ներկայացումները իր հարթակում ընդգրկելով և Հայաստանում ցուցադրելով: Իսկ ներկա, 12-րդ փառատոնը, ըստ նրա, թե ժանրային բազմազանությամբ և թե նորարական նյութի հագեցվածությամբ ոչնչով չի զիջում այլ երկրներում կազմակերպվող համանման միջոցառումներին::

ՀԵՂ.՝ ԹԱԳԼՈՒՐ
    Դիտվել է 935 անգամ