Քաղաքակրթական ներուժը կեցության բարձրագույն արժեք է:

Հայտնի են դարձել «Բալետի Օսկար»-ի հավակնորդների անունները

04.18.2014


Այսօր Մոսկվայի Մեծ թատրոնում հայտարարվեցին «Benois de la danse» (Բալետային Բենուա) Միջազգային բալետային մրցույթի մրցանակի թեկնածուների անունները, որոնցից հաղթողը հայտնի կդառնա և կպարգևատրվի մայիսի 27-ին: Իսկ արարողությունից հետո, հաջորդ օրը, ըստ արդեն գործող ավանդության կկայանա պարի ոլորտում այդ հեղինակավոր մրցանակին տարբեր տարիների արժանացած արտիստների գալա համարգը, հաղորդում է «newsru.com»-ն՝ հղում անելով «ԻՏԱՐ-ՏԱՍՍ»-ին:

Մրցանակը, որ հաճախ անվանում են նաև «Բալետի Օսկար», հիմնադրվել է 1991թ.-ին՝ Խորեոգրաֆիայի միջազգային կազմակերպության կողմից:

2013թ.-ի արդյունքներով «Լավագույն խորեոգրաֆիա» անվանակարգում առաջադրվել են 4 թեկնածուներ՝ Ալեքսեյ Ռատմանսկին, Պատրիկ դե Բանան, Ֆեյ Բոն և Մաուրիսիո Վայնռոթը:
Պարուհիներից մրցանակի են հավակնում 7 արտիստուհիներ՝ Պոլինա Սեմյոնովան, Վիկտորիա Տերեշկինան, Էշլի Բոուդերը, Լիու Յու Յաոն, Մարիքո Քիդան, Նադյա Մյուզիկան և Լորա Էկեն:
Մրցանակի թեկնածու պարողները նույնպես 7-ն են՝ Թիմուր Ասկյարովը, Օդրիկ Բեզարը, Շեն Ջիեն, Կլաուդիո Կավելլոն, Հերման Քարնեհոն, Խուան Պաբլո Լեդոն և Նիքլաս Էքը:

«Սա ոչ թե աստղերի հավաքույթ է, այլ բացառապես թատերաշրջանի ամենալավ և հետաքրքիր աշխատանքների ներկայացում: Ամեն ինչ բացառիկ մաքուր է և թափանցիկ…»,- նշել է Մեծ թատրոնի բալետի գեղարվեստական ղեկավար Սերգեյ Ֆիլինը:

Բոլոր անվանակարգերում հաղթողների անունները կիմացվեն մայիսի 27-ին, բացառությամբ ամենապատվաբեր անվանակարգին՝ «Կյանքը արվեստի մեջ ներդնելու համար» մրցանակին արժանացածի անունը: Այդ թեկնածուն, համաձայն մրցանակաբաշխության կանոնակարգի հայտարարվել է դեռևս անցյալ տարվա արարողության ժամանակ: Դա աշխարհահռչակ խորեոգրաֆ Ջոն Նոյմերն է:
    Դիտվել է 1702 անգամ